Infiniti blu

Një roman shkencor i lëvruar shumë pak në letërsinë shqipe, por shumë i nevojshëm për t’ua bërë të dashur astronominë dhe fizikën. Gërshetimi i të dhënave shkencore për infinitin dhe pafundësinë e bën librin shumë tërheqës, teksa lexuesi fiton informacion të pasur shkencor ndërthurur me rrëfimin artistik. Romani u jep përgjigje pyetjeve rreth pafundësisë dhe përjetësisë. A është e pafundme Bota? Apo është thjesht një strukturë gjigante që diku përfundon? E si mbaron? Sa larg kemi mundur ta shohim me instrumentet tona? A ka pasur dikur një fillim? A do të ketë dikur një fund? Apo Bota ka qenë e do të jetë e përjetshme? Sa imët mund ta copëtojmë lëndën? Po hapësirën? Pafundësisht? Apo ka një stad ku copëzimi ndalet. Sa thellë ka depërtuar imagjinata dhe dija shkencore? A mundet mendja jonë ta kuptojë infinitin? Apo jemi veç sqimatarë të pandreqshëm. Dhe mëkatarë mendjelehtë. Përgjigjet rreth PAFUNDËSISË lexuesi do t’i marrë nëpërmjet personazheve inteligjentë, të cilët i njohin mjaft mirë të fshehtat e planetit tonë të brishtë.