Kerol

Jeta e dy grave mori ngjyra të tjera, sapo sytë e tyre u ndeshën. Befas gjithçka ndryshoi dhe i dha realitetit të jetës së përditshme të tjera ndjesi, lumturinë, aventurën, emocionet dhe gjallërinë. Tërmeti i dashurisë preku qeniet e tyre. Ky çast magjik përmbysi çdo gjë dhe e shndërroi monotoninë në një rrugëtim drejt së panjohurës, për të rigjetur të vërtetat e përgjumura brenda dy zemrave femërore që digjen në heshtje. Të lexosh romanin “Kerol”, do të thotë t’u japësh përgjigje pyetjeve: Çfarë çmimi ka dashuria? Sa e rëndë është barra e saj dhe sa i lartë është shpërblimi për këdo që guxon dhe sfidon gjithçka për ta shpëtuar atë? Sa larg mund të shkojnë dy zemra për ta gjetur dashurinë brenda vetes? Çfarë shëmbëlltyre ka dashuria e një gruaje? Cili emër do ta përligjë atë? Dashuria në këtë roman vjen me një pamje tjetër. Ajo shfaqet dhe përplaset si valët, ëmbël dhe fuqishëm, gjithëpërfshirëse dhe e pandalshme…